Sahir Ludhianvi- Hawas Naseeb Nazar Ko Kahin Qaraar Nahin

Sahir Ludhianvi

Hawas Naseeb Nazar Ko Kahin Qaraar Nahin
Main Muntazar Hoon, Magar Tera Intezaar Nahin

Hamin Se Rang-E-Gulistaan, Hamin Se Rang-E-Bahaar
Hamin Ko Nazm-E-Gulistaan Pe Ikhtiyaar Nahin

Abhi Na Chhed Muhabbat Ke Geet Ai Mutrib
Abhi Hayaat Ka Maahaul Khush-Gavaar Nahin

Tumhaare Ahd-E-Vafa Ko Main Ahd Kya Samjhoon
Mujhe Khud Apni Muhabbat Ka Aitbaar Nahin

Na Jaane Kitne Gile Is Mein Muztarib Hain Nadeem
Vo Ek Dil Jo Kisi Ka Gilaa-Guzaar Nahin

Gurez Ka Nahin Qaa’el Hayaat Se, Lekin
Jo Sach Kahoon To Mujhe Maut Naa-Gavaar Nahin

Ye Kis Maqaam Pe Pahuncha Diya Zamaane Ne
Ke Ab Hayaat Pe Tera Bhi Ikhtiyaar Nahin

                 ----------------

Posted in: Sahir Ludhianvi